Takk for meg til fantastiske Hardanger musikkfest

jun 16, 2017

Takk for meg til fantastiske Hardanger musikkfest

Del

Pinsehelga hadde eg gleda av å vere med på Hardanger musikkfest. Under kan du lese diktet eg skreiv til avslutninga av festivalen, Oppskåka – eit prateprogram med dei to dyktige arrangørane Therese Birkelund Ulvo og Tora Augestad (biletet). Heldige meg hadde elles gleda av å jobbe med dyktige musikarar som Bengt Forsberg (klaver), Birgitte Christensen (sopran), Håvard Lund (bassklarinett) og Sigbjørn Apeland (trøorgel). Ei stor oppleving!

NYBROTT II

frå lofthus
til kinsarvik
til eidfjord
til agatunet
til tyssedal
odda og
jondal

hit og dit
over humpete veg
og ruskete fjord

fram og tilbake
fram og tilbake

og vêret skiftar
og blir sol, og vêret
skiftar og blir skodde
og vêret skiftar og blir
regn – mykje regn

er deildo open?
thats the question!

når går eigentleg ferja?
kven køyrer hit? – og
kven køyrer dit?

vel – nokon køyrer!

nokon køyrer eit orgel
nokon køyrer eit kor

nokon kokar kaffi
og nokon lagar mat

nokon lagar cider
nokon lagar eplesaft

og nokon passar
festivalpoetens barn
blir klemt og kyssa og
klappa på rompa – igjen
og igjen

ja, kva var vel
musikkfesten utan
ein frende eller tre –
utan gisle, marita
kjetil og dei åtte
ungane

tidleg oppe og seint i seng
minutt på minutt, baguett på
baguett, mil på mil, i gul trøye
med hovudet så vidt over
fjorden

og så er det tora og therese
ragnhild, alf magnus og kari

heile året organiserer
programmerer og
komponerer dei

for berre slik
kan tonane klinge
mellom fjella

klavertonane
klarinettonane
orgeltonane
sopran- og
tenortonane

og stian spelar
bengt og ingfrid
håvard og sigbjørn
frank og ingeleiv
alle spelar

og birgitte syng
og sigrid syng
og tora sings

dei syng på
svensk, på norsk
på tysk og på engelsk

og så er det orkestra og
koret, sjølve hovudpulsårene

det er mange som spelar
mange som syng

stadig nye konstellasjonar
stadig nye improvisasjonar
stadig nye nybrott

det er rare hattar og rare dikt
det er fine flasker og fabelaktige
bunader

dagane er lange, nettene korte

det er 2017, det er vårt nabolag
det er hardanger, det er musikkfest

men snart er det 2018

snart er det
natur og endring

noko stansar her
noko stansar no

men langt meir
byrjar her
byrjar NO!

Share on Google+Pin on PinterestPrint this pageEmail this to someoneTweet about this on TwitterShare on Facebook

Comments are closed.